Dychwelyd i’r Newyddion

Datganiad i’r Wasg: Ebrill 30ain 2003

Mae’r Frenhines yn cyhoeddi gwobr Jiwbilî newydd ar gyfer 'arwyr addfwyn’ ein cymunedau, meddai Tessa Jowell.

Bydd arwyr addfwyn ein cymunedau yn derbyn cydnabyddiaeth barhaol mewn gwobr newydd ar gyfer gwasanaeth gwirfoddol gan grwpiau i nodi achlysur Jiwbilî Aur y Frenhines, meddai’r Ysgrifennydd Diwylliant Tessa Jowell heddiw.

Gan groesawu’r cyhoeddiad a wnaed gan y Frenhines yn ystod ei hanerchiad i’r ddau Senedd-dŷ, meddai Tessa Jowell:

“Bydd Gwobr Jiwbilî Aur y Frenhines yn rhoi cydnabyddiaeth genedlaethol haeddiannol i’r miloedd lawer o ‘arwyr addfwyn’ sy’n llafurio’n ddiflino ledled y DU i helpu eu cyd-ddinasyddion. Mae’r wobr yn dangos pa mor bwysig yng ngolwg y Frenhines yw gwasanaeth cymunedol a gwirfoddol gan dimau a grwpiau ymroddedig, ac yn rhoi cyfle hefyd i bawb enwebu a dathlu’r cyfraniad amhrisiadwy y maent yn ei wneud i’n cymunedau.

Mae’r gwobrau hyn yn ffordd o gofio’n barhaol am Jiwbilî Aur y Frenhines, gan barhau i anrhydeddu’r gymuned a’r gweithwyr gwirfoddol flwyddyn ar ôl blwyddyn. Rwy’n annog pobl ar draws y DU i ddiolch i’w ‘harwyr addfwyn’ trwy eu henwebu ar gyfer y wobr.”

Mae unigolion yn gallu cynnig grwpiau neu dimau o’r sector gwirfoddol a chymunedol ar gyfer un o hyd at 200 o wobrau blynyddol trwy lenwi Ffurflen Enwebu, fydd ar gael o Swyddfa Gwobr Jiwbilî Aur y Frenhines. Mae grwpiau sy’n gymwys ar gyfer y wobr yn dod o’r holl sbectrwm cymunedol a gwirfoddol, o dimau o wirfoddolwyr i’r grwpiau lleiaf yn cynnwys ychydig o unigolion yn cydweithio yn eu cymuned leol. Y dyddiad cau ar gyfer enwebiadau eleni fydd Medi 30ain 2002.

Meddai’r Ysgrifennydd Cartref, David Blunkett, sydd yn gyfrifol am bolisi’r Llywodraeth ar weithgareddau gwirfoddol a chymunedol:

‘Bob dydd, ym mhob cwr o’r wlad, mae grwpiau yn cyflawni gwaith hollbwysig yn eu cymunedau. Mae pobl sy’n gweithio gyda’i gilydd yn trawsnewid eu cymdogaethau trwy eu gallu creadigol a’u gwaith caled’.

Bydd Gwobr Jiwbilî Aur Flynyddol y Frenhines yn rhoi cydnabyddiaeth i’r rhai sy’n helpu i wneud eu cymdogaethau a’u cymunedau’n lleoedd gwell i ni i gyd.”

Meddai prif weithredwr Cyngor Cenedlaethol Sefydliadau Gwirfoddol (NCVO) Stuart Etherington:

Mae Cyngor Cenedlaethol Sefydliadau Gwirfoddol (NCVO) yn falch iawn bod y Frenhines, yn ei blwyddyn Jiwbilî, wedi penderfynu creu gwobr am waith eithriadol gan sefydliad gwirfoddol neu gymunedol. Bydd y wobr hon yn ffordd addas o gydnabod y cyfraniad gwerthfawr i’n cymuned a ddarperir gan sefydliadau gwirfoddol a chymunedol a’r miliynau o wirfoddolwyr sy’n eu cefnogi.”

Meddai Alison West, Prif Weithredwr y Sefydliad Datblygu Cymunedol:

“ Mae yna filoedd o grwpiau cymunedol bach ar draws y DU. Maen nhw’n gwneud gwahaniaeth aruthrol i fywyd y gymuned, ond dydyn nhw ddim bob amser yn cael y gydnabyddiaeth maen nhw’n ei haeddu. Bydd y gwobrau yn rhoi hynny iddyn nhw, ac rydw i’n siŵr y bydd hyn yn anogaeth fawr i’r rhai hynny sy’n weithgar yn y grwpiau.”