Mae defnyddwyr y ganolfan yn sylweddoli fod y ganolfan yn cynnig hafan ddiogel, sy’n groesawgar ac yn rhydd rhag wahaniaethu, cam-drin na beirniadaeth mewn cyfnod anodd iawn yn eu bywydau.  Mae Body Positive Dorset ei hun wedi bod yn destun gwahaniaethu o’r fath, yn wynebu gwrthwynebiad lleol wrth wneud cais am gyllid i’r ganolfan gefnogi.  Mae’n glod i’r 32 gwirfoddolwr fod gwaith Body Positive wedi ennill parch a chydnabyddiaeth y gymuned leol erbyn hyn.  Y gwirfoddolwyr hyn sydd nid yn unig yn staffio ac yn cynnal y ganolfan 5 prynhawn yr wythnos a’r llinell gymorth 24 awr y dydd, ond sydd hefyd yn codi arian, gwneud gwaith cysylltiadau cyhoeddus a gwaith addysgiadol allanol i ysgolion ac ysbytai lleol.  Mae gan y mudiad hefyd gysylltiad agos iawn a’r clinig GUM lleol, sy’n annog ei gleifion i gysylltu â Body Positive Dorset am gymorth a chyngor ar ôl cael diagnosis.

Meddai’r cyfarwyddwr, Barbara Heffernan: 'Mae pawb yn y ganolfan wrth eu boddau eu bod wedi derbyn y Wobr.  Mae’r Wobr yn cydnabod gwaith caled y gwirfoddolwyr a’r staff cefnogi sydd, neu sydd wedi bod, ynghlwm wrth Body Positive Dorset dros y blynyddoedd, ac mae’n briodol dros ben gan fod y mudiad yn dathlu ei ben-blwydd yn 20 oed.  Gobeithiwn y bydd y Wobr hefyd yn helpu i amlygu’r angen am ganolfannau megis Body Positive Dorset, ac yn sicrhau bod pobl yn sylweddoli fod HIV ac AIDS yn dal i fod yn bynciau o fewn ein cymdeithas na ellir eu hanwybyddu’.
Cyswllt: Barbara Heffernan
Ffoniwch: 01202 297386
Gwefan: www.bodypositivedorset.org

Braunstone Stars and Angels

Mae Braunstone Stars and Angels yn darparu gweithgaredd gwirfoddol yn y gymuned i blant o bedair oed i fyny i ddysgu canu a pherfformio ar y llwyfan.  Mae’r grŵp hefyd yn rhoi cyfle i’r plant berfformio mewn cynyrchiadau, sy’n cael eu llwyfannu i godi arian i’r ysbyty lleol, Ymchwil Canser, Sefydliad Frenhinol y Galon a’r RSPCA.

Yn ogystal â darparu hyfforddiant llais a pherfformio, mae’n rhoi rhywle i blant lleol fynd a rhywbeth i weithio tuag ato.  Mae perfformio mewn cynyrchiadau o flaen cynulleidfa fawr yn helpu gwella hyder llawer o’i aelodau, sgiliau all eu helpu mewn agweddau eraill o’u bywydau.

Yn ystod y pum mlynedd diwethaf, mae’r grŵp wedi codi arian er lles llawer o bobl sy’n llau ffodus na nhw.

Cyswllt: Maria Sawbridge
Ffoniwch: 0116 2299727

The Calder Valley Search and Rescue Team

Mae Tîm Chwilio ac Achub Calder Valley (CVSRT) yn gweithredu fel tîm achub gwirfoddol, dan ganllawiau’r sefydliad cenedlaethol – Y Cyngor Achub ar Fynyddoedd, ac mewn cydweithrediad a than reolaeth Heddlu Gorllewin Swydd Efrog.

Sefydlwyd CVSRT ym 1966 i ddarparu cyfleusterau chwilio, achub ac adfer i gymunedau Calderdale, ardal o dros 140 milltir sgwâr, yn cynnwys ardaloedd mawr o gefn gwlad anghysbell a garw.

Mae’r tîm yn fedrus wrth achub a symud anafedigion, gan ddarparu lefel uchel o gymorth meddygol a chymorth cyntaf.  Mae’r tîm hefyd yn gwneud gwaith achub â rhaffau ar glogwyni a thir serth ac mae’n darparu system gyfathrebu mewn ardaloedd anghysbell.  Hyd yn hyn eleni, mae’r tîm wedi ateb 23 galwad, yn cynnwys symud anafedigion o leoliadau anghysbell sydd wedi bod yn uniongyrchol gyfrifol am achub bywyd.

Fel mudiad gwirfoddol, mae’r tîm ar y cyfan yn cyllido ei hun ac yn dibynnu ar gyfraniadau elusennol gan y cyhoedd.  Yn ogystal â’u hyfforddiant a galwadau i ddigwyddiadau byw, maen nhw’n canfod amser i godi arian nid yn unig drostynt eu hunain ond hefyd er lles elusennau lleol a chenedlaethol eraill, yn cynnwys Nyrsys Macmillan, Ymchwil Canser ac Elusen Canser Plant y Candlelighters.  Maen nhw hefyd yn ymroddedig i addysgu pobl ifanc a grwpiau lleol ac i godi ymwybyddiaeth o faterion yn cynnwys diogelwch yn yr awyr agored, cymorth cyntaf, harddwch naturiol yr ardal leol a phwysigrwydd cadwraeth.

Fel modd o ad-dalu’r cyhoedd am eu cyfraniadau caredig, mae’r tîm yn ymwneud llawer â Phrosiectau Cymunedol yn Nyffryn Calder, megis glanhau afonydd, marsialu’r goelcerth flynyddol yn Hebden Bridge, dyletswyddau maes parcio mewn digwyddiadau mawr, yn ogystal â dyletswyddau stiwardio mewn digwyddiadau athletig a beicio amrywiol.

Cyswllt: Michael Smith
Ffoniwch: 01422 373901
Symudol: 07770636064
E-bost: micksandra@lineone.net
Gwefan: www.cvsrt.co.uk

Cancer Link Aberdeen & North (CLAN)

Cafodd CLAN ei sefydlu ddau ddeg dau o flynyddoedd yn ôl gyda’r bwriad o ddarparu cefnogaeth emosiynol i bawb sy’n cael ei effeithio gan ganser yng Ngogledd Ddwyrain yr Alban, Orkney a Shetland.  Drwy ddargyfeirio oddi wrth driniaethau mwy confensiynol, mae CLAN yn unigryw yn ei bwyslais ar drin yr unigolyn yn holistig, gan nodi a mynd i’r afael ag achosion gwaelodol.

Mae’r grŵp yn anelu at ddarparu gwybodaeth, cefnogaeth, addysg a therapïau yn rhad ac am ddim i unrhyw un sy’n cael ei effeithio gan ganser yn uniongyrchol neu’n anuniongyrchol (yn benodol y rhai sy’n sâl, y rhai mewn profedigaeth a gofalwyr).  Mae llu ymroddedig CLAN, gyda dros 130 o wirfoddolwyr, yn cynnig lle i leihau straen a rhannu ofnau, yn ogystal â phethau i dynnu sylw, y mae mawr angen amdanynt, megis dosbarthiadau, seminarau, celf a chrefft.

Drwy gyfrwng y mentrau hyn mae CLAN yn ffynhonnell gobaith ac anogaeth lle efallai na fyddai unman arall i droi.  I ddeall yn union beth mae CLAN wedi’i gyflawni, does dim ond rhaid siarad gyda chleient neu berthynas sydd wedi elwa yn sgil amrywiaeth eang o wasanaethau.  Yn wir, mae’r mudiad yn derbyn llu o adborth canmoliaethus iawn, ac mae’n llwyddo i ddenu’r cyfraniadau angenrheidiol i’w alluogi i barhau gyda’r gwaith da.  Ar ben hyn, dros y 12 mis diwethaf bu’n agos i 8,000 o ymweliadau i’r ganolfan, ac mae gwasanaethau dros y ffôn ac e-bost wedi galluogi’r grŵp i helpu 272 o bobl eraill.  Wedi dweud hyn, nid yw CLAN yn dibynnu ar gyflawniadau’r gorffennol, ac mae bob amser yn ymdrechu i ganfod dulliau arloesol o wella’r gwasanaeth.

Yn anffodus, mae CLAN wedi dioddef problemau cyllido yn ystod y blynyddoedd diweddar oherwydd galwadau cynyddol sy’n rhoi straen ar adnoddau’r elusen.  Er mwyn codi ymwybyddiaeth o’r elusen a maint ei waith, mae CLAN ar hyn o bryd yn edrych ar godi ei broffil drwy amrywiaeth o strategaethau hyrwyddo ar hyd a lled y rhanbarth.
 
Cyswllt: Mrs. Debbie Thompson
Ffoniwch: 01224-647000
Gwefan: www.clanhouse.org

Canterbury and District Recorder

Papur newydd llafar yw’r Canterbury and District Recorder ar gyfer y rhai â nam ar y golwg ag anabledd gyda phrint.  Byddant yn anfon casét bob wythnos yn rhad ac am ddim, gyda’r holl newyddion lleol arno.

Mudiad annibynnol yw’r Canterbury and District Recorder gafodd ei sefydlu bron 30 o flynyddoedd yn ôl gan Dennis Eldridge, oedd yn ddall ac a ddaeth yn ymwybodol o anghenion pobl eraill ar ôl i’w wraig recordio’r newyddion lleol iddo.  Doedd dim byd ar gael ar y pryd, felly daeth yn weledigaeth iddo ddarparu gwasanaeth newyddion lleol wedi’i recordio ar gyfer pobl eraill.

Mae’r grŵp yn cynnwys gwirfoddolwyr ymroddedig sy’n dod at ei gilydd i ddarllen a recordio gwahanol rannau o’r Gazette (Rhifyn Canterbury and District). Mae’r tapiau’n cadw pobl mewn cysylltiad â gwybodaeth a newyddion lleol, yn cynnwys manylion ffyrdd ar gau, trywyddau bysiau ac amserau trenau.

Wynebodd Canterbury and District Recorder rwystr anodd y llynedd pan fu farw’r sylfaenydd, Denis Eldridge, yn drasig ar ôl colli’i gydbwysedd a syrthio i lawr grisiau, yn drist iawn ychydig cyn yr oedd i dderbyn MBE (Aelod o’r Ymerodraeth Brydeinig).  Fodd bynnag, cariodd yr helpwyr ymlaen â’r gwaith da fel teyrnged iddo ac maen nhw’n benderfynol i symud y mudiad ymlaen drwy barhau i ddarparu gwasanaeth arbennig ar gyfer y bobl ddall ac anabl yn y gymuned er cof amdano.

Meddai Jane Handley, ysgrifenyddes Canterbury District Recorder: “Dechreuodd fy rhan bersonol i yn y gwaith pan gafodd fy nhad strôc ddifrifol oedd yn golygu na allai drafod papur newydd, a’i fod yn colli cael gwybod am ddigwyddiadau lleol.  Rydw i’n gweithio i’r Kentish Gazette ac fe ddes i adnabod gwirfoddolwyr o’r Canterbury and District Recorder oedd yn dod i gasglu’r papur newydd bob wythnos.  Roedd angen ysgrifenyddes arnyn nhw a rhywsut neu’i gilydd fe ffeindiais fy hun yn gwneud y gwaith.  Pan ddaeth cyfnod a ninnau heb stiwdio, daeth Grŵp y Kent Messenger i’r adwy a darparu stiwdio wedi ei adeiladu at y pwrpas ar ein cyfer yn Canterbury.”

Cyswllt: Jane Handley
Ffoniwch: 01227 713 632
Gwaith: 01227 768 181
E-bost: luboo@fsmail.net

The Chalke Valley Link Scheme

Mae Cynllun Cyswllt Chalke Valley yn gweithredu yn Chalke Valley a’r pentrefi cyfagos, gan ddarparu gofal, cefnogaeth a chludiant i bobl hŷn.  Mae gwirfoddolwyr yn rhoi o’u hamser i sicrhau bod trigolion hŷn lleol yn gallu parhau i fyw’n annibynnol drwy eu cludo at apwyntiadau meddygol, i’r swyddfa post a’u helpu i gario eu siopa.

Sefydlwyd y cynllun mewn ymateb i’r dirywiad mewn gwasanaethau lleol yn yr ardal, wrth i siopau pentref, swyddfeydd post a meddygfeydd gau, gan olygu bod trigolion hŷn yn ei chael hi’n fwyfwy anodd i gyrraedd gwasanaethau allweddol. Datblygodd y gwirfoddolwyr y cynllun i helpu’r bobl hŷn yma i gyrraedd y gwasanaethau, gan ymateb i dros 650 o alwadau mewn un flwyddyn yn unig.

Yn ystod y ddegawd y mae’r cynllun wedi bod yn gweithredu, mae’r gwasanaeth wedi helpu dod â phobl leol at ei gilydd ac wedi galluogi pobl hŷn i aros yn eu cartrefi’n hwy nag a fyddai wedi bod yn bosibl fel arall.  Mae’r cynllun hefyd yn dod â’r pentrefi at ei gilydd drwy ei weithgareddau codi arian, megis cyngerdd diweddar y bu pentrefwyr o bob oed yn ei fynychu a’i gefnogi.  Mae gallu’r cynllun i feithrin yr ymdeimlad cymunedol cryf hwn hefyd wedi annog pobl newydd i helpu gyda’r cynllun, gydag 88 o wirfoddolwyr yn rhan ohono erbyn hyn.

Cyswllt: Tristram Sykes
Ffoniwch: 01722 780443

Children with Special Needs Foundation

Mae’r Sefydliad Plant ag Anghenion Arbennig yn cefnogi plant a’u rhieni drwy gynnig offer, gwyliau, hyfforddiant a gofal hanfodol i blant ag anghenion arbennig.  Gan weithio gyda gweithwyr cymdeithasol, meddygol a phenaethiaid ysgolion ar draws De Ddwyrain Lloegr, mae’r Sefydliad wedi helpu codi arian i roi hunan hyder ac annibyniaeth i blant ag anghenion arbennig drwy ymateb i’w hanghenion.

Gwelodd Maer a Maeres Surrey Heath, Gordon ac Ann Parris, bod angen i gefnogi plant ag anghenion arbennig yn y gymuned leol gan ffurfio’r sefydliad ym 1995.  Roeddent yn gweld bod angen elusen ar rieni plant ag anghenion arbennig fyddai nid yn unig yn gallu cynnig cefnogaeth ariannol iddynt, ond fyddai hefyd yn helpu i’w hintegreiddio hwy a’u plant yn y gymuned leol.  Aethant ati i helpu darparu cyllid ar gyfer yr offer arbenigol a’r cyfleon hamdden yr oedd cymaint o’u heisiau ar y teuluoedd.

Yn y 10 mlynedd ers ei gychwyn, mae’r Sefydliad wedi darparu gwerth miloedd o bunnoedd o offer ar gyfer unigolion, ysgolion, grwpiau anghenion arbennig, ysbytai a hosbisau plant.  Mae’r Sefydliad wedi darparu offer yn amrywio o fyrddau snwcer i byllau nofio, ac mae wedi codi arian i sicrhau fod plant ag anghenion arbennig yn cael mynediad at yr offer y mae cymaint o’i angen arnynt.  Mae aelodau’r pwyllgor yn gwneud ymdrech arbennig i ymweld â rhieni i ganfod gofynion eu plant ac i drafod y problemau sy’n wynebu eu plant a’r opsiynau sydd ar gael iddynt.

Yn ogystal â darparu offer, mae’r Sefydliad hefyd yn talu am deithiau dydd a thripiau ar gyfer teuluoedd.  Y llynedd mynychodd dros 1,500 o rieni a’u plant bantomeim diolch i’r Sefydliad gyda dros 600 o blant  yn cael hwyl yn y ffair ym Mhark Frimley Lodge.  Mae’r Sefydliad hefyd yn codi arian ac yn trefnu gwyliau yn y DU, yn Ewrop ac yn yr UDA, gan gynnig seibiant a chyfle i ymlacio y mae mawr ei angen.  Mae’r Sefydliad hefyd yn berchen ar ddau gartref symudol 8 gwely yn Pagham, Bognor Regis, lle gall plant a’u rhieni dreulio amser a chael hwyl.

Meddai’r Sylfaenwyr Gordon ac Ann Parris: ‘Rydyn ni’n credu ei bod hi’n wych fod y Sefydliad wedi derbyn y wobr yma.  Mae’n ymddiriedolwyr, ein noddwyr ac aelodau’r pwyllgor yn ei theimlo hi’n fraint i fod wedi cael ein hystyried am y wobr hyd yn oed, felly mae ennill yn arbennig iawn i ni.  Hoffem ddiolch hefyd i’r busnesau a’r unigolion lleol sydd wedi cefnogi’r Sefydliad.  Hebddyn nhw, ni fyddai elusen wedi bodoli yn y lle cyntaf’.

Cyswllt: Gordon Parris
Ffoniwch: 07776 256802 / 01276 856216
Gwefan: www.childrenwithspecialneeds.co.uk/

Cricket for people with Disability (CFPD)

Cafodd Criced i bobl ag Anabledd (CFPD) ei sefydlu, ac mae’n cael ei redeg, gan yr efeilliaid Fred a Dick Wildgoose i gwrdd ag anghenion pobl o bob oed a phob gallu i gymryd rhan mewn gweithgareddau chwaraeon.  Am dros bum mlynedd, maen nhw wedi trefnu Gemau i’r Anabl Rotary yn yr ardal, sydd erbyn hyn yn denu dros 250 o bobl o bob rhan o’r wlad i gymryd rhan.  Mae llawer o’r rhai sy’n cystadlu yn y gemau hefyd am gymryd rhan yn y sesiynau criced diwrnod cyfan sy’n cael eu trefnu gan y brodyr Wildgoose.  Mae’r efeilliaid yn codi arian i’r CFPD yn ddiflino, gan drefnu digwyddiadau arbennig a helpu i bacio bagiau wrth y til mewn archfarchnadoedd yn gyfnewid am gyfraniadau.

Menter leol oedd hon yn wreiddiol, ond mae gweithgareddau’r grŵp wedi ysbrydoli gwirfoddolwyr eraill yn rhanbarthol ac yn genedlaethol i gefnogi nodau ac amcanion y CFPD.  Mae sesiynau a gynhaliwyd gan y brodyr yn y ganolfan hamdden leol a’r clwb criced wedi galluogi pobl ag anableddau i chwarae criced yn Lords a hyd yn oed i gymryd rhan mewn taith yn India, gyda ‘gemau prawf’ rhwng chwaraewyr anabl y ddwy wlad.

Meddai David Crowhurst, Ficer Croesoswallt:
“Mae Fred a Dick yn cyfrannu oriau maith yn gweinyddu ac yn y gwaith ymarferol o redeg y gemau hyn, yn ogystal ag arwain y codi arian angenrheidiol.  Y wobr yw gweld pobl anabl (dros ben weithiau) yn cymryd rhan yn llawn mewn criced a gweithgareddau chwaraeon eraill, gan roi’r profiad o gyflawni iddynt, yn unigol ac mewn timoedd.  Rwy’n falch i gefnogi a chymeradwyo’r enwebiad hwn.”

Cyswllt: Fred Wildgoose
Ffoniwch: 01691 661 341
E-bost: fred@wildgoose.org

Crowborough Vale Drama Group

Ers 1955, mae Grŵp Drama Crowborough Vale wedi bod yn cefnogi’r gymuned leol drwy godi arian i brynu offer i achosion da ac elusennau.  Bob blwyddyn bydd y Grŵp yn llwyfannu ‘Rifíw Blynyddol’ sy’n cael ei ariannu a’i gynhyrchu gan y grŵp.  Mae gwirfoddolwyr yn ysgrifennu sgriptiau, yn gwneud gwisgoedd ac yn dylunio ac adeiladu setiau, ac mae’r Rifíw wedi dod yn rhan ganolog o galendr y gymuned, gyda’r tocynnau’n gwerthu allan bob blwyddyn.

Drwy gydol y flwyddyn, mae arian yn cael ei godi i ariannu gweithgareddau’r Grŵp drwy ffeiriau sborion, barbiciw yn yr haf a Dawns Sgubor Calan Gaeaf. Yn ogystal â chodi arian i lwyfannu’r sioe, mae gwirfoddolwyr hefyd yn darparu adloniant am ddim i Ysbyty Goffa Crowsborough a Chanolfan Gofal Dydd Hookstead; gan gynnwys pobl ifanc yn yr ardal leol sy’n aml yn cymryd rhan.  Mae’r Grŵp hefyd wedi cael gwahoddiad i berfformio yng Ngharchar Dartmoor ac ar BBC Radio Sussex.  Mae gwirfoddolwyr hefyd yn ymddangos bob blwyddyn yng Ngharnifal Crowborough – y llynedd roedden nhw wedi gwisgo fel y Calendar Girls!

Mae’r Grŵp yn cyfrannu’r holl elw o’r Rifíw i achosion da lleol, a’r caredigrwydd hwn sydd wedi ennyn edmygedd a pharch y trigolion lleol.  Mae llwyddiant y Grŵp wedi golygu eu bod, am dros 20 mlynedd, wedi gallu rhoi grantiau i achosion lleol yn cynnwys Clwb Strôc Crowborough, Ambiwlans Sant Ioan, Canolfan Gofal Dydd Crowborough a’r Grŵp Ffibrosis Cystig.

Meddai Cydlynydd y Grŵp, Pauline Lavington: 'Rydyn ni ar ben ein digon ar ôl ennill y wobr hon. Redden ni’n ei theimlo’n anrhydedd i gael ein henwebu hyd yn oed, felly mae ennill yn annisgwyl ac mae pawb yn y Grŵp wrth eu bodd.’

Cyswllt: Pauline Lavington
Ffoniwch: 01892 663436

Cuckmere Community Bus

Mae gwasanaeth Bws Cymunedol Cuckmere yn cynnig amwynder lleol effeithiol, dibynadwy, wedi’i brisio’n gystadleuol i drigolion lleol nad oes ganddynt fynediad at gar ynghyd â nifer o ymwelwyr i’r ardal.  Mae’r bysiau wedi dod yn nodwedd o fywyd lleol, gan ddarparu, pan fo angen, gwasanaeth arbennig i gefnogi digwyddiadau lleol lle nad yw defnyddio trafnidiaeth breifat yn cael ei annog.

Mae’r gwasanaeth wedi bod yn rhedeg ers 1975 ac mae’n cael cefnogaeth gan y Cyngor Sir.  Mae’r grŵp sy’n ei redeg, yn wirfoddolwyr gwrywaidd a benywaidd, wedi bod yn llewyrchus dros yn agos at 30 mlynedd gan ei droi’n fenter gymdeithasol dan reolaeth leol yn canolbwyntio ar ddarparu gwasanaeth i’r 15 cymuned wledig.  Mae’r bysiau wedi ennill enw da am fod yn wasanaeth cyfeillgar ac effeithiol, gan guro hyd yn oed weithredwyr bysiau proffesiynol i ennill y wobr ‘Bysiau am Bleser’ yn seremoni wobrwyo’r Diwydiant Bysiau yn 2000.

Mae’r gwasanaeth hwn yn cael ei weithredu’n gyfan gwbl gan y gymuned leol er budd y gymuned honno.  Mae gan aelodau Bws Cymunedol Cuckmere awydd dwfn i gynnig amwynder y mae angen mawr amdano a gwasanaeth gwerthfawr i drigolion ac ymwelwyr.

Cyswllt: Beryl Smith
Ffoniwch: 01323 870032

Gwefan: www.cuckmerebus.freeuk.com

The Deeping Men’s Group

Mae Grŵp Dynion Deeping yn codi arian i brynu cadeiriau olwyn ac offer meddygol arall ac yna eu rhoi ar fenthyg yn rhad ac am ddim i unrhyw un sy’n byw o fewn dalgylch Canolfan Iechyd Deepings.

Sefydlwyd y grŵp 50 mlynedd yn ôl fel cyfrwng i bobl yr ardal gael cyswllt cymdeithasol ac i godi arian i elusennau.  Penodwyd swyddogion elusennau a phenderfynwyd prynu cadeiriau olwyn gyda’r arian oedd yn cael ei godi ganddynt.

Mae’r gwirfoddolwyr yn cyfrannu tuag at godi arian, prynu a chynnal a chadw offer, rhedeg y gwasanaeth 7 diwrnod yr wythnos a helpu pobl mewn angen.
 
Cyswllt: Michael Moss
Ffoniwch: 01778 342037

Donna’s Dream House

Mae Tŷ Breuddwydion Donna’n darparu gwyliau am ddim yn Blackpool drwy gydol y flwyddyn ar gyfer plant sydd â salwch terfynol a’u teuluoedd, ac yn cynnig gwasanaeth cefnogi mewn profedigaeth ar wahân yng Nghanolfan Snowdrop.

Cychwynnwyd Tŷ Breuddwydion Donna gan y cadeirydd, ei wraig a’i deulu yn fuan ar ôl i’w merch farw o ganser yn 20 oed.  Erbyn hyn mae ganddynt dros 400 o bobl yn aros yn Nhŷ Breuddwydion Donna bob blwyddyn ac mae dros 170 o bobl leol wedi ceisio cefnogaeth gan Ganolfan Snowdrop.

Mae’r plant sy’n dod i Dŷ Breuddwydion Donna’n rhy sâl i fynd dramor, ac felly am gyfnod byr mae gan eu teuluoedd y cyfle i fwynhau gwyliau olaf gyda’u plant.  Diolch i ymroddiad a gwaith caled llawer o wirfoddolwyr lleol a phobl sy’n gwneud gwasanaeth cymunedol, trawsnewidiodd yr elusen adeilad adfeiliedig yn hafan ar gyfer plant a’u teuluoedd.  Gyda’r ystafell chwarae wych a’r pedwar rhandy ar thema, mae Tŷ Breuddwydion Donna’n dod ag ymdeimlad o hwyl i fywydau plant.

Ar y dechrau fe wynebodd yr elusen broblemau gyda’r gymuned leol oherwydd bod troseddwyr cymunedol yn cymryd rhan yn y gwaith ac oherwydd y gwaith unigryw anhysbys yr oedd yr elusen wedi mynd ati i’w wneud.  Er mwyn cael dros y broblem, fe sefydlwyd fforwm i bobl y gymuned leol fynegi eu barn a chael profiad o’r ganolfan gan ganiatáu iddynt weld budd gwaith y troseddwyr a mwynhad y teuluoedd.

Mae’r elusen wrthi ar hyn o bryd yn adnewyddu ail dŷ i ddarparu gwyliau am ddim i bobl ifanc yn eu harddegau sydd â salwch terfynol ac i’w teuluoedd.

Meddai Len Curtis, cadeirydd Tŷ Breuddwydion Donna: “Mae ennill Gwobr y Frenhines yn anrhydedd ac yn tystio i’r llu gwirfoddolwyr a gyfrannodd i wireddu ein Tŷ Breuddwydion Donna arbennig i blant.  Gwyliwch y gofod hwn i weld cyhoeddiad “Y Freuddwyd Eithaf”.

Cyswllt: Len Curtis
Ffoniwch: 01253 752 222
Gwefan: www.donnasdreamhouse.org
E-bost: lencurtis@btconnect.com

Down’s Syndrome Association Northern Ireland

Mae Cymdeithas Syndrom Down Gogledd Iwerddon yn darparu cefnogaeth ar gyfer pobl sydd â Syndrom Down, eu teuluoedd a’u gofalwyr.  Mae’r gefnogaeth yn amrywio o drefnu gwyliau a ‘dyddiau hwyl’, digwyddiadau codi ymwybyddiaeth a digwyddiadau addysgiadol eraill yn mynd i’r afael â phob agwedd o’r syndrom.

Mae’r grŵp yn hwyluso dod â phobl at ei gilydd sy’n cael eu heffeithio gan y syndrom a’r cyrff iechyd a gwasanaethau cymdeithasol lleol.  Mae’r cynllun penwythnos ‘Rhieni Newydd” yn cyflwyno teuluoedd sydd newydd gael babi â Syndrom Down i’r gwasanaethau a’r therapyddion fydd yn rhan o ofal a datblygiad eu babanod newydd.

Mae’r grŵp hefyd yn dosbarthu gwybodaeth i bobl sy’n cael eu heffeithio gan y syndrom, gan ddarparu cyngor gwerthfawr.  Yn ogystal â chefnogi’r teuluoedd, mae’r gwirfoddolwyr yn rhoi wythnos o’u hamser i fynd â rhai yn eu harddegau ar wyliau i gynorthwyo ar wyliau plant yng Nghanolfan Shore.  Mae’r gwirfoddolwyr yn ymuno ym mhob gweithgaredd ac yn helpu gyda gofal personol lle bo angen, er mwyn sicrhau fod pawb yn mwynhau’r gwyliau.

Cyswllt: Tracey Falls
Ffoniwch: 02890 704606
Gwefan: www.downs-syndrone.org

Folkestone Migrant Support Group

Mae Grŵp Cefnogi Mewnfudwyr Folkestone yn darparu cyfleusterau i liniaru tlodi a thrallod ymysg ffoaduriaid, ceiswyr lloches ac ymfudwyr yn ardal Folkestone.

Cafodd Grŵp Cefnogi Mewnfudwyr Folkestone ei sefydlu ym 1991, mewn ymateb i anghenion yn dilyn rhyfeloedd Bosnia a Kosovo.  Daeth yn elusen gofrestredig yn 2001 pan ddechreuodd y cynnydd yn nifer y ceiswyr lloches herio gwasanaethau lleol.

Amcanion yr elusen yw ymestyn addysg y cyhoedd o ran anghenion ffoaduriaid, ceiswyr lloches ac ymfudwyr, drwy symbylu ysbryd cymunedol a rhwydweithio gydag asiantaethau eraill perthnasol.

Mae’r grŵp yn wynebu amryw o anawsterau a gwrthwynebiad yn y gymuned leol, yn cynnwys llythyrau bygythiol a gwrthdaro treisgar rhwng grwpiau.  Ond maen nhw wedi gweithio’n ddiflino yn y dirgel er mwyn chwalu’r rhagfarnau.  Mae’r grŵp wedi annog ysgolion a sefydliadau meddygol i dderbyn pobl nad ydynt yn siarad Saesneg, wedi galluogi plant o lawer o wahanol wledydd i gael mynediad at addysg o gyfnod cyn-ysgol ymlaen ac wedi cefnogi oedolion sy’n dysgu.  Drwy gefnogi unigolion a grwpiau sy’n darparu addysg ieithoedd a chyfieithu, mae’r grŵp yn ceisio galluogi mewnfudwyr i ymdoddi i’r gymdeithas.  Mae’r holl wirfoddolwyr sy’n cymryd rhan yn rhoi amser, sgiliau ac eiddo i bobl y mae eraill yn eu hanwybyddu ac yn eu tro mae’r teuluoedd sydd wedi setlo yn awr yn helpu rhedeg grwpiau a gweithgareddau eu hunain er mwyn chwalu’r rhwystrau.

Four Groves Community Association

Mae Cymdeithas Gymunedol Four Groves yn gweithio mewn ardal o dai cyngor gan fwyaf yn ward Risedale, sydd yn y 10% uchaf o ardaloedd difreintiedig yn y wlad.  Yn wreiddiol cafodd ei sefydlu i fynd i’r afael â’r dirywiad yn yr ysbryd cymdeithasol a’r amgylchedd lleol, mae’r gymdeithas yn awr yn gweithio i hyrwyddo ac i alluogi llawer o brosiectau eraill yn y gymuned.

Yn ystod y pum mlynedd y bu’n gweithredu, mae’r grŵp wedi tyfu ac wedi ehangu yn yr ardal ac erbyn hyn mae’n gweithio’n agos gyda’r awdurdod lleol, yr heddlu ac asiantaethau eraill, sy’n caniatáu iddo gynnig amrywiaeth ehangach o wasanaethau yn y gymuned. 

Mae’r gymdeithas nid yn unig wedi helpu i gynyddu balchder pobl yn eu cymuned leol, ond mae hefyd wedi hybu ymdeimlad bod modd gwneud rhywbeth i wella eich amgylchedd lleol.

Fe weithiodd y gymdeithas yn galed i sefydlu’i hun yn y gymuned, ac ar y dechrau fe wynebodd sgeptigaeth gan lawer o’r trigolion lleol.  Fodd bynnag, mae bwriadau da a gwaith caled y gwirfoddolwyr wedi helpu i greu teimlad cadarnhaol o gydlyniad a balchder ymysg y gymuned ehangach.

Cyswllt: Pauline Charnley
Ffoniwch: 01229 821210

Friends of Wombwell Cemetery

Mae Cyfeillion Mynwent Wombwell yn gweithio i gadw Mynwent Wombwell, gan helpu i’w wneud yn fan lle ceir heddwch a lle i fyfyrio i’r rhai mewn profedigaeth.

Yn dilyn achos o fygio yn y fynwent, mae’r Cyfeillion hefyd wedi cymryd y cyfrifoldeb dros amddiffyn yr ardal yn erbyn fandaliaeth a throseddu yn y dyfodol.  Mae ‘Gwylio’r Fynwent’ yn rhan annatod o Grŵp Cyswllt Gwarchod y Gymuned Barnsley, sy’n aelod cyswllt o’r Sefydliad Cenedlaethol.  Maen nhw’n gweithio’n agos gyda’r bartneriaeth Troseddu a Lleihau Trosedd lleol yn Barnsley a gyda’r gwasanaeth Profedigaeth.

Mae’r gwirfoddolwyr sy’n rhan o Gyfeillion Mynwent Wombwell, drwy eu gwaith caled a’u hymroddiad i gadw’r fynwent, wedi mynd y tu hwnt i ddisgwyliadau’r gymuned.  Y canlyniad yw bod mwy o drigolion yn ymweld â’r fynwent yn amlach i ofalu am feddau teuluol.  Ymysg y gwelliannau i ymddangosiad y fynwent mae adfer cerflun a syrthiodd flynyddoedd yn ôl, a diweddaru cofnodion hanesyddol i lunio cronfa ddata gyfrifiadurol o’r lleiniau yn y fynwent.

Cafodd y grŵp hwn effaith gadarnhaol ar bobl ifanc o fewn yr ardal, gan ail-gyflwyno ymdeimlad o ysbryd cymunedol.  Mae Cyfeillion Mynwent Wombwell wedi gwneud y fynwent yn lle mwy diogel a mwy pleserus ar gyfer trigolion.

Meddai Joy Bretton, un o Gyfeillion Mynwent Wombwell: “Os oedden ni wedi’n syfrdanu a’n cyffroi i gael ein henwebu am Wobr y Frenhines, roedden ni dros ben llestri mewn llawenydd a hapusrwydd [wrth ennill].  Os oedd angen sbardun erioed ar wirfoddolwyr i barhau i wirfoddoli, yna’r wobr hon yw’r sbardun hwnnw!”

Cyswllt: Mike Bretton
Ffoniwch: 01226 211595
Symudol: 0781 636 3864

0-F | G-L | M-Z